23 აგვისტოს, ბათუმს ესტუმრნენ IX კლასელი მოსწავლეები ქ. თბილისის ვაკე-საბურთალოს რაიონის სოციალურად დაუცველი და კოდაში განსახლებული დევნილი მოსახლეობის ოჯახებიდან. მოსწავლეები 1 სექტემბრის ჩათვლით მონაწილეობას მიიღებენ კონსტიტუციონალიზმის კვლევისა და ხელშეწყობის რეგიონალური ცენტრის პროექტში საზაფხულო სკოლა -,,კონსტიტუციონალიზმის გაკვეთილები“.
24 აგვისტოს, მოსწავლეები ესტუმრნენ კონსტიტუციონალიზმის კვლევისა და ხელშეწყობის რეგიონალურ ცენტრს. პროექტის მონაწილეებს მიესალმა კონსტიტუციონალიზმის დარბაზის განყოფილების უფროსი ლალი ტაკიძე, რომელმაც მოსწავლეებს მიულოცა საქართველოს კონსტიტუციის მიღების დღე.
მოსწავლეებმა მოისმინეს ლექცია კონსტიტუციონალიზმის პრინციპების შესახებ.
სამოქალაქო განათლებისა და საზოგადოებასთან ურთიერთობის დეპარტამენტის დირექტორმა სულხან მელაძემ ვრცლად ისაუბრა საქართველოს კონსტიტუციური ისტორიის შესახებ და აღნიშნა, რომ 1995 წლის 24 აგვისტოს საქართველომ ახალი კონსტიტუციის მიღებით, საფუძველი ჩაუყარა დემოკრატიული სახელმწიფოს მშენებლობას.
კონსტიტუციონალიზმის დარბაზის დათვალიერების, შემეცნებითი ილმის ,,კანონთა კანონი“ ნახვისა და თემატური ტესტების შევსების შემდეგ, პროექტის მონაწილეებს საქართველოს საკონსტიტუციო სასამართლომ უმასპინძლა.  საზოგადოებასთან ურთიერთობის სამსახურის წარმომადგენელმა ზვიად სირაბიძემ პროექტის მონაწილეებს მიაწოდა ინფორმაცია საკონსტიტუციო სასამართლოს დაარსების, მისი როლისა და მნიშვნელობის შესახებ. აღნიშნა, რომ საკონსტიტუციო სასამართლოს პირველი თავმჯდომარე ბატონი ავთანდილ დემეტრაშვილი იყო, რომელიც ამჟამად
კონსტიტუციონალიზმის კვლევისა და ხელშეწყობის რეგიონალურ ცენტრს ხელმძღვანელობს.
საზაფხულო სკოლის პროგრამის ფარგლებში მოსწავლეები ასევე მოისმენენ ლექციებს სისხლის, სამოქალაქო, ადმინისტრაციული სამართლის პრინციპების შესახებ. შეავსებენ თემატურ ტესტებს, მონაწილეობას მიიღებენ ინტელექტუალურ თამაშებში.
მოსწავლეებს, სასწავლო პროგრამისგან თავისუფალ დროს მიეცემათ აჭარის ავტონომიური რესპუბლიკის ღირსშესანიშნაობათა დათვალიერების შესაძლებლობა